माऊलीची माया होता माझा भिमराया

 चांदण्याची छाया कापराची काया

माऊलीची माया होता माझा भीमराया....

चोचीतला चारा देत होता सारा

आईचा उबारा देत होता सारा

भीमाईपरी चिल्यापिल्यावरी

पंख पांघराया होता माझा भीमराया....

बोलतात सारे विकासाची भाषा;

लोपली निराशा आता...लोपली निराशा ;

सात कोटीमधी विकासाच्या आधी

विकासाचा पाया होता माझा भीमराया....

झाले नवे नेते मलाईचे धनी ;

वामनाच्या मनी येती जुन्या आठवणी;

झुंज दिली खरी रामकुंडावरी;

दगडगोटे खाया होता माझा भीमराया.....

- वामनदादा कर्डक